منتديات ستار تايمز 3
 
الرئيسيةاليوميةبحـثالتسجيلدخول

شاطر | 
 

 سبع الاخوان وسبع العميان

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
oth_175
مراقب سابق
مراقب سابق


ذكر عدد الرسائل : 1321
العمر : 31
البلد : Maroc
الوظيفة : Génie informatique
تاريخ التسجيل : 04/08/2007

مُساهمةموضوع: سبع الاخوان وسبع العميان   السبت أغسطس 11, 2007 6:05 am



السلام عليكم .. جايب لكم قصة كانوا جداتنا يقصونها علينا واحنا صغار قبل النوم .. طبعا حاولت أكتبها بطريقة مفهومة بعيد عن كلام الشيبان .. وهم أضفت شغالات بسيطة أتمنى إنها تعجبكم

راح أنزل جزء بسيط .. إذا عجبتكم راح أكملها .. أتمنى ما تبخلون علي بردودكم


ما جانا وجاكم .. خيرٍ لفانا ولفاكم .. وشرٍ تعدانا وتعداكم .. وزور ابن الزرزور .. اللي عمره ما كذب ولا حلف زور .. وذبح له بقة وترس سبعة جدور .. وخلى اللحوم والشحوم على الصواني تدور ...
ولا يحلى الكلام .. إلا بذكر النبي عليه الصلاة والسلام ...



كان في ديرة رجال الله أنعم عليه بالمال .. تزوج له بنت من أحسن بنات الديرة .. جمال وجاه وعقل .. عاش مع زوجته أحلى الأيام .. كان عايش معها بحب وهنا .. بس الله ما رزقهم بعيال ..
بعد خمس سنين من الزواج .. قامت الزوجة تطلب من زوجها يتزوج حرمة ثانية .. خصوصا وإن الكلام زاد عليها من أهل زوجها والناس .. وإن المفروض محمد – اسم الزوج – يكون عنده عيال بعد هالسنين .. وإن هالخير بعد عينه لازم يأخذه عياله .. لكن محمد كان في كل مرة تطلب منه سارة – اسم الزوجة – هالطلب يقول لها : سمعي يا بنت الحلال العيال رزق من الله ومتى ما الله كتب لنا عيال راح يجون ، وما أبي أسمع طاري هالكلام مرة ثانية ...
كان هذا رده كل ما انفتح موضوع العيال أو الزواج من زوجته أو أحد غيرها ...
وبعد عشر سنين من زواج محمد وسارة رزقهم الله بولد سماه عبد الله .. وبعد سنة جاهم ولد ثاني .. وعلى هالحال كل سنة ولد ليما صار عنده سبع أولاد " عبد الله – عبد العزيز – عبد اللطيف – عبد الكريم – عبد الرزاق – عبد المجيد – عبد الرحمن " .. طبعاً محمد كانت فرحته قد الدنيا وسارة الدنيا مو سايعتها وقال لزوجته : شفتي يا أم عبد الله إن الله رزقنا بالذرية بعد صبرنا ، ونذرٍ علي إن هالسبع الأولاد ما يتزوجون إلا سبع بنات خوات ..
بعد عشر سنين ماتت سارة .. وحزن عليها محمد خصوصا وإن عياله بعدهم صغار أكبرهم عمره ثلاثتعش(13)سنة وأصغرهم قريب السنتين .. حاول قرايبهم وجيرانه إنه يتزوج مرة ثانية .. لكنه كان يرفض وكان رده هو خوفه على إن الزوجة الجديدة تعذب عياله أو تهملهم وإنه صبر سنين ليما الله رزقه هالعيال ...
المهم ربى محمد عياله أحسن تربية وحرص عليهم .. ولما صار عمر عبد الرحمن سبعتعش(17) قام اخوه عبد الله يقول لأبوه : يبه أبي أتزوج .. رد أبوه : أصبر ليما يصير عمر أخوك دحيم عشرين .. استغرب عبد الله من كلام أبوه وسأله : ليش يبه؟!! .. محمد : يا ولدي أنا يوم الله رزقني اياكم نذرت إني أزوجكم سبع خوات ، ودحيم توه ما قوى عوده على مسؤولية البيت والحرمة والعيال .. سكت عبد الله مع إن كلام أبوه ما عجبه .. وراح علم أخوانه ما عدا عبد الرحمن .. طبعا الأخوان انزعجوا من هالشي خصوصا إنهم كبروا وغصب عليهم ينتظرون ثلاث سنين حتى يصير عمر أخوهم الصغير عشرين سنة .. قاموا يكلمون قرايبهم حتى يتدخلون ويكلمون أبوهم إنه يغير رايه .. وفعلاً راح كبار العيلة لمحمد وطلبوا منه يزوج عياله .. لكن محمد رفض طلبهم وقال لهم : أنا ناذر نذر وعيالي ما يعرسون إلا مع بعض بليلة وحدة من سبع خوات ، وهذا كلامي وما عندي غيره ، وجيتكم على عيني وراسي بس ما أحب أحد يتدخل بيني وبين عيالي ...
طبعاً رد محمد هذا خلى القريب والغريب ما يفتح هالموضوع له .. وسكت عياله عن هالموضوع .. لأن كلمة أبوهم مستحيل تتغير وما لهم إلا الصبر ليما يصير عمر عبد الرحمن عشرين ..
مرّت الأيام وسنة .. والثلاث السنين وصار عمر عبد الرحمن عشرين .. ورجع موضوع الزواج ينطرى من العيال والأهل والجيران قدام محمد ...
قام محمد وقال : الحين أقدر أزوج عيالي وأنا مرتاح ، بس لازم تكون الزوجات سبع خوات ...
وفعلا صار محمد وعياله يدورون في الديرة على سبع خوات .. لكن كل ما دقوا باب للخطبة والزواج وسألوا عن سبع بنات خوات .. كان الرد إن ما عندنا سبع بنات .. مرة بنتين ومرة أربع .. وبعد تعب لقوا بيت فيه ست خوات .. قام الأولاد يقنعون أبوهم إن يزوجهم هالبنات خصوصا وإن هالبنات من عيلة معروفة في البلد وجمالهم الكل يتكلم عنه .. رفض الأبو هالكلام وقال : النذر نذر، أنتوا سبع اخوان تتزوجون سبع خوات .. وزي ما تعوّد الأولاد إذا أبوهم قال كلمة مستحيل يتراجع عنها فسكتوا .. وصاروا يلومون أخوهم عبد الرحمن إنه سبب هالحالة اللي هم فيها وعبد الرحمن المسكين كان يعتذر لهم ويقول : يا اخواني تزوجوا أنا مو مستعجل على العرس .. فيردون عليه : روح قول لأبوك هالكلام مو لنا .. وهو ما صدق خبر راح لأبوه وقاله : يبه ليش ما تزوج اخواني أنا مسامح وما أبي أعرس الحين .. عصب محمد على ولده وقال : اسمع يا دحيم كلمة ما أثنيها وروح قولها لأخوانك ، زواجكم كلكم بليلة وحدة من سبع خوات .. سكت شوي وكمل : إلا إن الله ياخذ روحي أو يموت واحد منكم .. سكت عبد الرحمن وقام من عند أبوه مكسور الخاطر .. خصوصا وإن أبوه ما كان يرفض له طلب بحكم إنه آخر العنقود .. راح لأخوانه ومن وجهه عرفوا الرد وقالوا له : قلنا لك أبوك راسه يابس ما راح يغيّر كلامه .. رفع عبد الرحمن راسه وقال : لا وأزيدكم من الشعر بيت ، قال زواجنا كلنا بليلة وحدة من سبع خوات إلا إذا مات هو أو واحد منا .. قاموا الاخوان يتطالعون بينهم بين بعض وكل واحد براسه شي الله وحده يعلم فيه ...

أكمل وإلا أوقف ؟؟!!
/
/
/
/
/
//
/
/
/
/
/
/
/

مرّت أيام على كلمة أبوهم الأخيرة والاخوان ستة يتشاورون في اللي قاله أبوهم .. تكلم عبد الله : يعني يا نتزوج سبع خوات أو أبونا يموت أو واحد منا الله ياخذه .. قال عبد الرزاق : البنات زي ما تعرفون ما لقينا ، والموت بيد رب العالمين ، يعني ما في أمل نعرس .. تدخل عبد اللطيف : بعيد الشر عن أبوي ، جعل عمره طويل .. قال عبد الرزاق : ما قصدت أبوي ، قصدي واحد منا .. سكت الاخوان شوي وهم يناظرون بعض .. قال عبد المجيد : كيف ؟؟ ، قصدك نذبح واحد منا ؟! .. عبد الرزاق : لا ما توصل لهالدرجة ، قصدي إن واحد منا يبتعد عن الديرة حتى يظن الكل إنه مات ، وقتها نقدر نتزوج .. عبد العزيز : ومن منا راح يتنازل ويسويها؟؟ .. وطالع باخوانه .. قال عبد الكريم : عبد الرحمن .. طالعوا فيه اخوانه .. كمل كلامه : هو بنفسه قال إنه مو مستعجل على العرس .. قال عبد الله : تهقون لو قلنا له راح يرضى ؟ .. سكتوا وقال عبد المجيد : ما أظن ، تعرفون شلون دحيم متعلق بأبوي ، ولو قلنا له يمكن يعيي أو يمكن يقول لأبوي .. ناظروا ببعض وقال عبد المجيد : كلش إلا أبوي يدري ، إن درا ما راح نتزوج .. عبد الله : طيب والدبرة الحين ؟ ، دحيم هو الوحيد اللي يصلح يبعد بس شلون؟ .. سكتوا وجلسوا يفكرون بحيلة أو طريقة يتخلصون فيها من اخوهم .. اللي قال نضربه على راسه ولما يغمى عليه نقطه في البر .. واللي قال لا نرميه في سفينة تاخذه لديرة بعيدة .. واللي واللي .. المهم كل فكرة واحد يقولها يطلع واحد ويشوف إنها ما تصلح وممكن أخوهم يموت ويتحملون ذنبه .. ظلوا في حيرة مو عارفين شلون يتخلصون من أخوهم ...

طبعا كل هذا يصير وعبد الرحمن يا غافلين لكم الله .. وفي مرة من المرات جا عبد الله لاخوانه وهم جالسين محتاسين بمشكلتهم خصوصا وإن العمر يمر وبعدهم ما تزوجوا وما في أمل لسبع خوات حتى يتزوجونهم وتخلص مشكلتهم .. المهم جا عبد الله لاخوانه وقال : لهم لقيتها .. عبد اللطيف : وش اللي لقيتها ؟! .. عبد الله : الطريقة اللي نبعد فيها دحيم عن الديرة والناس تفكر إنه مات ، ونعرس .. عبد المجيد : شلون ؟! .. عبد الله : الله يسلمكم وأنا جالس بالقهوة سمعت شايب يسولف عن بير قديم في بعيد عن الديرة ، يقول إن هالبير غويط وما له قرار ، وقال بعد إن هالبير من عمقه يوصل للأرض السابعة ، بسم الله علينا .. الأخوان ساكتين ومنبهرين بكلام أخوهم الكبير .. قال عبد العزيز : بس يا خوي يمكن يطيح وتنكسر رقبته ونتحمل ذنبه .. رد عبد الله : مالت عليك الحين أنت مصدق كلام هالشايب ، تلقاه مخرف ، سمعوا وش يقول لكم ، احنا نروح مع دحيم على إننا طالعين نقنص ، ولما نوصل عند البير نطلب منه ينزل يجيب لنا ماي ، وإذا نزل نخليه ونرجع ، ونقول لأبوكم والناس إنه ضاع منا في البر وإن احنا دورنا عليه وما لقينا غير ثيابه المقطعة ، وش رايكم بهالراي .. سكتوا شوي وقال عبد الرزاق : طيب وش مدريك إن هالبير موجود ؟! ، مو يمكن هالشايب على قولتك المخرف يقول كلام فاضي .. قال عبد الله وابتسامة خبيثة على وجهه : ما عليك أنا سألت وتأكد من إن هالبير موجود ويبعد عن ديرتنا مسافة شهر ، وبعدين لا تخافون ، هالبير على طريق الناس دوم تمره ، يعني دحيم راح يلاقيه أحد ويطلعه وعلى ما يرجع نكون احنا عرسنا ، ووقتها بيكون أبوكم تحت الأمر الواقع .. سكت الأخوان وهم مبسوطين إنهم لقوا الطريقة اللي بتريحهم وتحل مشكلتهم ...

بعد أيام من خطتهم الشريرة .. بدوا الاخوان الستة يقنعون أبوهم على رحلة القنص وكان اللي يتكلم عنهم عبد الله أخوهم الكبير ...
عبد الله : يبه نبي نطلع القنص .. الأبو : أنتوا الستة ؟! .. عبد الله : لا سبعتنا .. محمد : بس دحيم ما مرة طلع معكم وما يعرف شي بالقنص .. عبد الله : علشان كذا نبيه يروح معنا ، دحيم كبر ولازم يعرف القنص .. محمد : بس كلكم بتطلعون يعني ولا واحد منكم بيظل عندي .. عبد الله : يبه كلها شهرين وراجعين ، وبعدين ودنا نطلع كلنا حتى نتقرب من بعض .. محمد مو مقتنع : ما يخالف ، بس ما أوصيكم على بعض ، ديروا بالكم على روحكم .. الاخوان مبسوطين .. عبد الله : أكيد يبه ، لا توصي اخواني بعيوني .. محمد : الله يحفظكم .. قام الاخوان من عند أبوهم والفرحة مو سايعتهم ...
بعد كم يوم استعد الاخوان للرحلة .. وكان عبد الرحمن طاير من الفرحة لأنه أول مرة يطلع يقنص ومتحمس وقبل ليطلعون من الديرة وهو يسأل اخوانه : وين بنروح ؟ ، وش نبي نقنص ؟ ، وكم يوم بنظل ؟ ، ومن هالأسئلة .. وفي البداية اخوانه كانوا يردون عليه .. لكن بعد كم يوم ملوا منه وصاروا يحقرونه ...
وصل الاخوان بوسط الصحرا للبير اللي اتفقوا يقطون عبد الرحمن فيه .. وقفوا عنده .. قام عبد الله وقال : ذبحنا العطش خلونا نريح شوي ونشرب ماي ونريح خيولنا بعد .. جلسوا عند البير ونزلوا السطل بس ما طلع ماي .. قال عبد الله : شكله الماي نقص ولازم واحد منا ينزل يشوف .. وغمز اخوانه .. قام كل واحد يتعذر بعذر اللي خايف واللي ما فيه حيل واللي ثقيل واللي واللي .. المهم اختاروا عبد الرحمن .. الولد ما كذب خبر ربط نفسه وقال لاخوانه : لا تفلتون الحبل .. ونزل في البير.. نزل شوي وما شاف ماي وكان مبين على البير إنه عميق .. قام ينادي اخوانه : ما لقيت شي .. وهم يقولون له : انزل بعد .. والمسكين مصدق وينزل وينزل .. المهم .. ما لقى ماي وصار دوبه يشوف فتحة البير .. صار ينادي اخوانه : ما لقيت ماي .. ما جاه رد .. رفع صوته : عبد الله مالقيت شي .. هم ما جاه رد .. خاف وصار يصرخ وينادي اخوانه كل واحد باسمه .. لكن اخوانه تركوه ورجعوا للديرة ...
الرجوع الى أعلى الصفحة اذهب الى الأسفل
nana sihsih
مراقبة سابقة
مراقبة سابقة


انثى عدد الرسائل : 2398
تاريخ التسجيل : 26/06/2007

مُساهمةموضوع: رد: سبع الاخوان وسبع العميان   السبت أغسطس 11, 2007 3:37 pm

ألف شكرا لك الموضوع الرائع
نحن ننتظر مواضيعك بفارغ الصبر
جزاك الله خيرا على مواضيعك المفيدة
واصل تألقك معنا في منتدانا الرائع ستار تايمز 3
بارك الله فيك ولا تحرمنا من جديدك
تــــــــــــــــــــــــــــــابع
تحيــــــــــــــــــــــــــاتي
الرجوع الى أعلى الصفحة اذهب الى الأسفل
iklouz
مشرف سابق
مشرف سابق


عدد الرسائل : 1565
تاريخ التسجيل : 04/08/2007

مُساهمةموضوع: رد: سبع الاخوان وسبع العميان   السبت أغسطس 11, 2007 6:14 pm

merci
الرجوع الى أعلى الصفحة اذهب الى الأسفل
رجل الظل
مشرف سابق
مشرف سابق


ذكر عدد الرسائل : 5452
العمر : 21
البلد : marocco
تاريخ التسجيل : 25/12/2010

مُساهمةموضوع: رد: سبع الاخوان وسبع العميان   الثلاثاء ديسمبر 28, 2010 7:11 pm

الرجوع الى أعلى الصفحة اذهب الى الأسفل
 
سبع الاخوان وسبع العميان
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
startimes3 :: المنتديات العامة :: الأدب و الشعر-
انتقل الى: